Мактабгача таълим тизими узлуксиз таълимнинг бирламчи, энг асосий бўғини ҳисобланади. Мутахассисларнинг фикрича, инсон ўз умри давомида оладиган барча ахборот ва маълумотнинг 70 фоизини 7 ёшгача бўлган даврда олади. Ана шу далилнинг ўзи болаларнинг етук ва баркамол шахс бўлиб вояга етишида боғча тарбияси қанчалик катта аҳамиятга эга эканини яққол кўрсатиб турибди. Мактабгача таълим тизимида таълим-тарбия ишлари маълум мезонларга асосланган. Хусусан, юртимизда барча боғчаларда “Илк қадам” давлат дастури асосида таълим-тарбия берилади. Дастурнинг мазмун-моҳияти, мақсад-муддаоси эса ниҳоятла салмоқли ва долзарб.
Самарқандда мактабгача таълим ташкилотлари директорлари учун “Илк қадам” давлат ўқув дастури асосида ривожлантирувчи муҳитни ташкил этишда янги ёндошувлар" мавзусида семинар-тренинг ўтказилди.
Семинарда МТТ раҳбарининг ривожлантирувчи муҳитни режалаштиришдаги вазифаси ва ўрни, Мактабгача ёшдаги болаларга таълим-тарбия бериш технологияларини қўллаш борасида Мактабгача таълим агентлиги мусъулларининг маърузалари тингланди. Семинар эртага ҳам ўз ишини давом эттиради.

Самарқанд вилояти Мактабгача ва мактаб таълими бошқармаси ахборот хизмати